無邊的黃v.s.黑框的白

雨傘運動發展至今變得很複雜，帶來很大爭議，這從小學生身上也可得見。以下是我兩名分別就讀小二與小五的子女一段相關的對話：

女：我覺得哩次運動有好有唔好。

爸：點解？

女：啲人佔用馬路好似唔係咁好，因為阻住人，點解唔佔公園或者其他地方？

[爸心諗：佔公園？咁熟嘅，佢係邊到學返嚟？]

那時，兒子插嘴說

子：家姐，你錯喇，就係因為政府唔聽人講，所以啲人先至要去佔馬路，佢哋係爭取真普選，總之梁振英要下台。

[爸心諗：將啲概念炒埋一碟，佢明唔明自己講乜？試吓佢先。]

爸：但係，佢哋阻住人喎。

子：都唔係好阻啫，我認為無問題。

爸：梁振英話有普選，人人都可選特首。

女：唓﹗呃人嘅，都唔係真係有得揀。

[爸心諗：唉﹗連細路女都知]

爸：咁，你哋會唔會去參與抗議？

女：唔去，我怕比人打。

子：我唔怕喎。

爸爸為兒子滴汗

我與太太沒有特別給他們上政治課，他們在家一同接收相同的資訊，但各自觀點都可以有明顯分別。這分歧或許跟性格有關，女兒愛守規矩，也敢於當面指出朋友犯規，我以她這勇敢正直為傲。兒子愛創作畫畫，這氣質的人不重視規範，我也羨慕他勇於突破。我見他們心平氣和地討論，便感到安慰與感恩。

(圖片說明：兒子明顯是沒有邊界的黃，女兒不是藍，也非綠，她不過是一個黑白分明有清晰框架的人。)

浩浩妙語錄 (廿三)

浩浩愛畫畫，他與媽媽經過一間畫室

媽：「浩浩，你睇啲畫幾靚，不如喺哩道學畫畫囉﹗」

浩：「好呀‥‥都係唔好。」

媽：「點解呀？」

浩：「哩道啲小朋友啲畫咁靚，哩道啲老師一定好惡，所以唔好」

媽不知好嬲還是好笑。

媽在執拾芊芊兩年前小一的書簿。

浩：「媽，你喺道做乜？」

媽：「我幫家姐執D舊書，留起啲書，因為可以再留比你用。」

浩：「咁嗰啲點解放喺地下？」

媽：「嗰啲係家姐用過嘅作業同簿，用唔返咖喇，會攞去廢紙回收。」

浩：「我要哩啲。」

媽：「家姐用過，寫過字係上面，刷唔到，用唔翻。」

浩：「咁咪仲好，我第日用翻哩啲簿咪唔使做功課囉﹗」

芊浩妙語錄 (廿一/廿二)

爸跟芊浩講初期教會故事，講到教父殉道‥‥

爸以手作刀放在芊芊的頸上，問：「如果我係羅馬士兵，依家捉到你，問你係唔係信耶穌，你點答？」

芊：「我好驚，唔知點答，仲想喊添。」

爸見芊芊似乎真的有點驚，就以司提反故事安慰她。

爸以同樣方式轉問浩浩。

爸：「你係唔係信耶穌嘅？」

浩指著芊芊說：「佢係信耶穌咖。」

爸爸在教導芊芊如何用facebook，浩浩在旁觀看

芊：「我點樣可以睇到我啲朋友呀？」

爸：「click哩到，嗱，就睇到哂你啲朋友。」

芊：「係喎﹗我見到XXX同YYY呀﹗」

浩浩看見後很驚訝地問

浩：「哩啲都係家姐啲朋友嚟嗄？」

爸：「係呀﹗」

浩：「嘩﹗原來家姐係識得超人咖﹗」

當時畫面顯示芊芊facebook朋友的「個人資料相片」，其中大部份是真人相片，但有一兩幅是卡通人物超人的圖片。

芊浩妙語錄 (廿/廿一)

爸隨意問：「芊，你想邊個做特首？」

芊：「我都唔知點揀。」

爸好奇地問：「點解咁講呀？」

芊：「我同唐xx(芊芊的同學)係好朋友，所以想揀唐英年做特首，但梁xx(芊芊另一名同學)又係我嘅朋友，我又想揀梁振英喎。所以都唔知點揀。」

爸：「哦﹗原來係咁‥‥‥」

一家人在觀看特首候選人論壇

浩：「點解佢哋成日做錯事？佢又話佢做得唔好，佢又成日講對唔住。」

爸：「係呀」

浩：「佢又講大話，佢又無禮貌咁指住人。佢哋都唔好做特首。」

爸：「咁邊個做呀？」

浩：「我做囉﹗」

爸：「‥‥‥」

芊：「我鍾意何俊仁做，因為佢話學生可以做少啲功課。」